شارك.ي فالتغيير

مجهول

تيزنيت

"هاد الشي وقع فـ 1990، فصباح شتوي مشمس. كانت عندي غير 14 عام، وكنت كنقرا فروضي، ملي جا عندي بابا وقال ليا خاصني نحبس القراية. كان سبق ليه واختار ليا راجل باش نتزوج بيه، واحد تعرف عليه فالسوق ديال الدوار. الغد مشينا لمكتب العدل فـإنزكان. منين سولوني واش موافقة، بقيت ساكتة… وسكوتي تحسب موافقة. بعد مدة قصيرة، لقيت راسي مزوجة، وانتقلت نعيش فمدينة أخرى، ووليت أم من بعد عام. راجلي كان كيستعمل العنف ضدي، وما كانش كيخليني نخرج، وكنت كنعيش فالخوف والعزلة. طفولتي سالات بكري بزاف، والأحلام ديالي فالقراية تبدلات بهمّ البقاء والعيش يوم بيوم."

10:00 صباحا | ماي 1، 2024

مجهول

الحسيمة

"خرجوني من القراية، وأنا كان حلمي نولي طبيبة. زوجوني بالغصب وأنا مازال عندي غير 14 عام. حبسوني فالدار، وأنا كنت باغية نكتاشف العالم. ما عمري قدرت نلبس اللباس اللي كيعجبني. وما عمري قدرت نعبر على رأيي بحرية. هاد المعاناة دامت 35 عام. وفنهار من النهارات، قررت نحط ليها حد. قررت نرجع حرة، ونعيش حياتي بسعادة. طلقت، وبديت نخدم، وانتقلت نعيش فمدينة أخرى. ومنين كنفكر فهاد الشي دابا، كنضحك شوية. الغريب هو أن فكرة الحرية دخلات ليا من خلال فيلم. فيلم «الباب المفتوح»، وبالضبط المشهد اللي فيه فاتن حمامة واجهات العقلية الذكورية والتقاليد البالية، ورفضات تستسلم ليهم. من تما بديت كنآمن بلي الحرية ممكنة، وأن الحياة تقدر تبدا من جديد."

01:00 مساءً | 20 أكتوبر 2025